دَرْزَن النواب المنحل.!!

اللجنة الثورية تدعو أعضاء مجلس النواب للإجتماع الإثنين القادم للتشاور!

- طيب ياخي، ليش هذي المرة ماقالوا "مجلس النواب المنحل"؟

* لأنهم اكتشفوا أن مجلس النواب مش كله "منحل".

- كيف "مش كله منحل"؟

* يعني "منحل شوية بس".

- كيف "منحل شوية بس"؟

* أوووف ياخي ما أبلدك: يعني اكتشفوا أن مفيش "منحل" في مجلس النواب إلا شوية النواب الـ12 اللي "انحلوا" أول ما قالوا لهم "ينحلوا" عشان "يحلوا" في "مجلس الحوثي"، فهمت؟

- أها، الآن فهمت، بارك الله فيك ياخي!

* لا شكر على واجب..

- يعني الحوثيين ماقالوش هذي المرة "مجلس النواب المنحل" لأنهم اقتنعوا أنه "مش كله منحل"؟

* يمكن..

- طيب والنواب الـ12 اللي "انحلوا"، تعتقد أيش يسموهم؟

* "درزن النواب المنحل".

- يعني ذلحين معانا اثنين: "مجلس نواب مش منحل" و"درزن نواب منحل"؟

* أيوه ياخي، قتلتني أسئلة..

- طيب، باقي دهفة ياأستاذ وأمشي لي؟

* اقطبْ!

- تعتقد الحوثيين دعوا أعضاء مجلس النواب اللي ما"انحلوش" عشان يتشاوروا مع "درزن النواب المنحل"؟

* لا ياخي..

- طيب عشان أيش؟

* عشان يقنعوهم "ينحلوا" مثل "الدرزن"..

- وليش كل هذا التعب؟

* عشان يكونوا يقولوا "مجلس النواب المنحل" وهم داغزين ريش..

- بس؟

* وعشان يحيى الحوثي يكون يجمعهم كلهم ويجلس يضحك عليهم ويقول لهم بين الجلسات: "يا منحلين"..

- أها، شكراً لك ياخي!

* أعاده الله علينا وعليك من السالمين..

- من هو؟

* مجلس النواب..